ਸੋਧੇ ਹੋਏ ਯੂਜੀਸੀ ਸਕੇਲ ਲਾਗੂ ਨਾ ਹੋਣ ’ਤੇ ਗਰਾਂਟ ਖੁੱਸਣ ਦਾ ਖਦਸ਼ਾ

ਸੋਧੇ ਹੋਏ ਯੂਜੀਸੀ ਸਕੇਲ ਲਾਗੂ ਨਾ ਹੋਣ ’ਤੇ ਗਰਾਂਟ ਖੁੱਸਣ ਦਾ ਖਦਸ਼ਾ

ਨਬਜ਼-ਏ-ਪੰਜਾਬ ਬਿਊਰੋ, ਮੁਹਾਲੀ, 20 ਜੂਨ:
ਪੈਨਸ਼ਨਰਜ਼ ਐਂਡ ਸੀਨੀਅਰ ਸਿਟੀਜ਼ਨ ਵੈਲਫੇਅਰ ਐਸੋਸੀਏਸ਼ਨ ਮੁਹਾਲੀ ਦੇ ਪ੍ਰਧਾਨ ਐਸਐਸ ਜਸਪਾਲ ਨੇ ਸੋਧੇ ਹੋਏ ਯੂਜੀਸੀ ਸਕੇਲ ਲਾਗੂ ਨਾ ਹੋਣ ਕਾਰਨ ਕੇਂਦਰੀ ਗਰਾਂਟ ਖੁੱਸਣ ਦਾ ਖ਼ਦਸ਼ਾ ਪ੍ਰਗਟ ਕੀਤਾ ਹੈ। ਅੱਜ ਇੱਥੇ ਜਾਰੀ ਬਿਆਨ ਵਿੱਚ ਉਨ੍ਹਾਂ ਕਿਹਾ ਕਿ ਐਮਐਚਆਰਡੀ ਨੇ 2 ਨਵੰਬਰ 2017 ਨੂੰ ਯੂਨੀਵਰਸਿਟੀ ਅਤੇ ਕਾਲਜ ਅਧਿਆਪਕਾਂ ਦੇ 1 ਜਨਵਰੀ 2016 ਤੋਂ ਸੋਧੇ ਹੋਏ ਤਨਖ਼ਾਹ ਸਕੇਲ ਲਾਗੂ ਕਰਨ ਲਈ ਸਾਰੇ ਸੂਬਿਆਂ ਦੀਆਂ ਸਰਕਾਰਾਂ ਨੂੰ ਪੱਤਰ ਭੇਜਿਆ ਗਿਆ ਸੀ। ਸੋਧੇ ਹੋਏ ਸਕੇਲ ਲਾਗੂ ਕਰਨ ਲਈ ਇਸ ’ਤੇ ਆਉਣ ਵਾਲੇ ਵਾਧੂ ਖਰਚੇ ਦੀ 50 ਫੀਸਦੀ ਗਰਾਂਟ ਵੀ ਕੇਂਦਰ ਸਰਕਾਰ ਨੇ ਦੇਣੀ ਹੈ। ਜੇਕਰ ਯੂਜੀਸੀ ਵੱਲੋਂ ਸੋਧੇ ਹੋਏ ਗਰੇਡ ਮਿੱਥੇ ਸਮੇਂ ਵਿੱਚ ਲਾਗੂ ਨਹੀਂ ਕੀਤੇ ਜਾਂਦੇ ਤਾਂ ਕੇਂਦਰ ਸਰਕਾਰ ਵੱਲੋਂ ਦਿੱਤੀ ਜਾਣ ਵਾਲੀ ਗਰਾਂਟ ਖ਼ਤਮ ਹੋ ਜਾਵੇਗੀ। ਉਨ੍ਹਾਂ ਮੰਗ ਕੀਤੀ ਕਿ ਇਸ ਸਮਾਂਬੱਧ ਗਰਾਂਟ ਦੀ ਵਰਤੋਂ ਲਈ ਪੰਜਾਬ ਸਰਕਾਰ ਨੂੰ ਤੁਰੰਤ ਹਰਕਤ ਵਿੱਚ ਆਉਣਾ ਚਾਹੀਦਾ ਹੈ।