ਬੈੱਸਟ ਸਟੂਡੈਂਟਸ ਆਫ਼ ਦਾ ਈਅਰ 2019-20 ਦਾ ਖ਼ਿਤਾਬ ਅੱਠਵੀਂ ਜਮਾਤ ਦੀ ਅਜਰਾ ਨੂੰ ਮਿਲਿਆ

ਬੈੱਸਟ ਸਟੂਡੈਂਟਸ ਆਫ਼ ਦਾ ਈਅਰ 2019-20 ਦਾ ਖ਼ਿਤਾਬ ਅੱਠਵੀਂ ਜਮਾਤ ਦੀ ਅਜਰਾ ਨੂੰ ਮਿਲਿਆ

ਨਬਜ਼-ਏ-ਪੰਜਾਬ ਬਿਊਰੋ, ਮੁਹਾਲੀ, 27 ਨਵੰਬਰ:
ਇੱਥੋਂ ਦੇ ਵਿਦਿਆ ਨਿਕੇਤਨ ਸੀਨੀਅਰ ਸੈਕੰਡਰੀ ਸਕੂਲ ਫੇਜ਼-1 ਵਿੱਚ ਵਿਸ਼ੇਸ਼ ਸਨਮਾਨ ਸਮਾਰੋਹ ਕਰਵਾਇਆ ਗਿਆ। ਜਿਸ ਵਿੱਚ ਸਕੂਲ ਦੀ ਹੋਣਹਾਰ ਵਿਦਿਆਰਥਣ ਅਜਰਾ ਨੂੰ ਬੈੱਸਟ ਸਟੂਡੈਂਟਸ ਆਫ਼ ਦਾ ਈਅਰ 2019-20 ਦਾ ਖ਼ਿਤਾਬ ਦੇ ਕੇ ਨਿਵਾਜਿਆ ਗਿਆ। ਵਿਦਿਆਰਥਣ ਨੂੰ ਇਹ ਐਵਾਰਡ ਸਕੂਲ ਦੇ ਡਾਇਰੈਕਟਰ ਸੰਜੀਵ ਸ਼ਰਮਾ ਅਤੇ ਪ੍ਰਿੰਸੀਪਲ ਸ੍ਰੀਮਤੀ ਜਯੋਤੀ ਸ਼ਰਮਾ ਨੇ ਦਿੱਤਾ।
ਸ੍ਰੀ ਸ਼ਰਮਾ ਨੇ ਦੱਸਿਆ ਕਿ ਬੈੱਸਟ ਸਟੂਡੈਂਟਸ ਆਫ਼ ਦਾ ਈਅਰ ਦਾ ਇਹ ਖ਼ਿਤਾਬ ਸਕੂਲ ਦੀ ਮਰਹੂਮ ਵਿਦਿਆਰਥਣ ਮਿਸ ਅਵਨੀ ਭਨੋਟ ਦੇ ਨਾਮ ’ਤੇ ਦਿੱਤਾ ਜਾਂਦਾ ਹੈ। ਜਿਸ ਨੇ ਕੈਂਸਰ ਵਰਗੀ ਗੰਭੀਰ ਬੀਮਾਰੀ ਨਾਲ ਜੂਝਦਿਆਂ ਕਦੇ ਹਿੰਮਤ ਨਹੀਂ ਹਾਰੀ ਸਗੋਂ ਲਗਾਤਾਰ ਆਪਣੀ ਪੜਾਈ ਜਾਰੀ ਰੱਖੀ ਅਤੇ ਛੋਟੀ ਉਮਰ ਵਿੱਚ ਹੀ ਕਈ ਵੱਡੀਆਂ ਪ੍ਰਾਪਤੀਆਂ ਵੀ ਕੀਤੀਆਂ। ਅਵਨੀ ਭਨੋਟ ਬਾਰ੍ਹਵੀਂ ਤੱਕ ਹਰੇਕ ਸਾਲ ਪੜ੍ਹਾਈ ਵਿੱਚ ਅੱਵਲ ਆਉਂਦੀ ਰਹੀ ਹੈ ਪ੍ਰੰਤੂ ਪਿਛਲੇ ਸਾਲ ਕੈਂਸਰ ਪੀੜਤ ਇਸ ਵਿਦਿਆਰਥਣ ਦੀ ਮੌਤ ਹੋ ਗਈ। ਉਨ੍ਹਾਂ ਦੀ ਮੌਤ ਤੋਂ ਬਾਅਦ ਸਕੂਲ ਮੈਨੇਜਮੈਂਟ ਨੇ ਸਕੂਲ ਦੇ ਇਕ ਹੋਣਹਾਰ ਵਿਦਿਆਰਥੀ ਨੂੰ ਹਰੇਕ ‘ਬੈੱਸਟ ਆਫ਼ ਦਾ ਈਅਰ ਖ਼ਿਤਾਬ ਦੇਣ ਦਾ ਫੈਸਲਾ ਲਿਆ ਗਿਆ ਸੀ। ਸਕੂਲ ਦੀ ਪ੍ਰਿੰਸੀਪਲ ਸ੍ਰੀਮਤੀ ਜਯੋਤੀ ਸ਼ਰਮਾ ਨੇ ਵਿਦਿਆਰਥੀਆਂ ਨੂੰ ਚੰਗੇ ਨਾਗਰਿਕ ਬਣਨ ਲਈ ਪ੍ਰੇਰਿਆ। ਉਨ੍ਹਾਂ ਦੱਸਿਆ ਕਿ ਅਜਰਾ ਨੂੰ ਸਨਮਾਨ ਵਿੱਚ 1100 ਰੁਪਏ ਨਗਦ ਅਤੇ ਇਕ ਯਾਦਗਾਰੀ-ਚਿੰਨ੍ਹ ਭੇਂਟ ਕਰਕੇ ਸਨਮਾਨਿਤ ਕੀਤਾ ਗਿਆ।