ਭਾਜਪਾ ਕੌਂਸਲਰ ਸੈਹਬੀ ਅਨੰਦ ਨੇ ਫੇਜ਼-7 ਵਿੱਚ ਸ਼ੁਰੂ ਕਰਵਾਏ ਵਿਕਾਸ ਕਾਰਜ

ਭਾਜਪਾ ਕੌਂਸਲਰ ਸੈਹਬੀ ਅਨੰਦ ਨੇ ਫੇਜ਼-7 ਵਿੱਚ ਸ਼ੁਰੂ ਕਰਵਾਏ ਵਿਕਾਸ ਕਾਰਜ

ਵਿਕਾਸ ਕਾਰਜਾਂ ਵਿੱਚ ਸਹਿਯੋਗ ਲਈ ਮੇਅਰ ਕੁਲਵੰਤ ਸਿੰਘ ਦਾ ਕੀਤਾ ਧੰਨਵਾਦ

ਨਬਜ਼-ਏ-ਪੰਜਾਬ ਬਿਊਰੋ, ਮੁਹਾਲੀ, 22 ਮਈ:
ਮੁਹਾਲੀ ਨਗਰ ਨਿਗਮ ਵੱਲੋਂ ਸ਼ਹਿਰ ਵਿੱਚ ਸ਼ੁਰੂ ਕੀਤੇ ਵਿਕਾਸ ਕਾਰਜਾਂ ਦੀ ਲੜੀ ਨੂੰ ਅੱਗੇ ਤੋਰਦਿਆਂ ਅੱਜ ਭਾਜਪਾ ਦੇ ਯੁਵਾ ਕੌਂਸਲਰ ਸੈਹਬੀ ਅਨੰਦ ਨੇ ਇੱਥੋਂ ਦੇ ਫੇਜ਼-7 (ਵਾਰਡ ਨੰਬਰ-20) ਵਿੱਚ ਵਿਕਾਸ ਕਾਰਜਾਂ ਦੀ ਰਸਮੀ ਸ਼ੁਰੂਆਤ ਕੀਤੀ ਗਈ। ਕੌਂਸਲਰਾਂ ਨੇ ਖ਼ੁਦ ਕਹੀ ਦਾ ਟੱਕ ਲਗਾਉਣ ਦੀ ਥਾਂ ਮੁਹੱਲੇ ਦੇ ਸੀਨੀਅਰ ਸਿਟੀਜਨਾਂ ਤੋਂ ਪੇਵਰ ਬਲਾਕ ਲਗਾਉਣ ਅਤੇ ਰਿਹਾਇਸ਼ੀ ਪਾਰਕ ਦੀ ਨੁਹਾਰ ਬਦਲਣ ਦੇ ਕੰਮ ਸ਼ੁਰੂ ਕਰਵਾਏ। ਯੁਵਾ ਕੌਂਸਲਰ ਦੀ ਇਸ ਨਵੀਂ ਪਿਰਤ ਦੀ ਚੁਫੇਰਿਓਂ ਸ਼ਲਾਘਾ ਕੀਤੀ ਗਈ।
ਇਸ ਮੌਕੇ ਸ੍ਰੀ ਸੈਹਬੀ ਅਨੰਦ ਨੇ ਕਿਹਾ ਕਿ ਰਿਹਾਇਸ਼ੀ ਖੇਤਰ ਵਿਚਲੀਆਂ ਸਮੂਹ ਪਾਰਕਾਂ ਨੂੰ ਸੈਰਗਾਹ ਵਜੋਂ ਵਿਕਸਤ ਕੀਤਾ ਜਾਵੇਗਾ। ਉਨ੍ਹਾਂ ਦੱਸਿਆ ਕਿ ਉਕਤ ਪਾਰਕ ਵਿੱਚ ਸੈਰ ਕਰਨ ਲਈ ਨਵੇਂ ਟਰੈਕ, ਨਵੇਂ ਬੈਂਚ ਅਤੇ ਉਨ੍ਹਾਂ ਦੇ ਹੇਠਾਂ ਪਲੇਟਫਾਰਮ, ਬਰਸਾਤ ਅਤੇ ਸਰਦੀ ਦੇ ਮੌਸਮ ਲਈ ਵੈਦਰ ਸੈਲਟਰ ਬਣਾਏ ਜਾਣਗੇ ਅਤੇ ਇਨ੍ਹਾਂ ਕੰਮਾਂ ’ਤੇ ਲਗਭਗ 11 ਲੱਖ ਰੁਪਏ ਖਰਚ ਕੀਤੇ ਜਾਣਗੇ। ਉਨ੍ਹਾਂ ਨੇ ਮੇਅਰ ਕੁਲਵੰਤ ਸਿੰਘ ਵੱਲੋਂ ਵਿਕਾਸ ਕਾਰਜਾਂ ਵਿੱਚ ਪੂਰਾ ਸਹਿਯੋਗ ਦੇਣ ਲਈ ਉਨ੍ਹਾਂ ਦਾ ਧੰਨਵਾਦ ਕੀਤਾ ਅਤੇ ਸਰਕਾਰੀ ਫੰਡਾਂ ਨੂੰ ਸਬੰਧਤ ਵਿਕਾਸ ਕਾਰਜਾਂ ’ਤੇ ਖਰਚਣ ਦਾ ਭਰੋਸਾ ਦਿੱਤਾ। ਉਨ੍ਹਾਂ ਠੇਕੇਦਾਰ ਨੂੰ ਹਦਾਇਤ ਕੀਤੀ ਕਿ ਇਹ ਸਾਰੇ ਕੰਮ ਬਰਸਾਤ ਤੋਂ ਪਹਿਲਾਂ ਪਹਿਲਾਂ ਨੇਪਰੇ ਚਾੜ੍ਹੇ ਜਾਣ।
ਇਸ ਮੌਕੇ ਅਮਰਨਾਥ ਸ਼ਰਮਾ, ਮੋਹਨ ਸਿੰਘ, ਹਰਭਜਨ ਸਿੰਘ ਅੌਲਖ, ਆਰ.ਪੀ.ਐਸ. ਵਿੱਜ, ਕਰਨੈਲ ਸਿੰਘ ਗੋਰਾਇਆ, ਬਲਬੀਰ ਸਿੰਘ ਵੜੈਚ, ਓ.ਪੀ. ਸੈਣੀ, ਟੀ.ਆਰ. ਗੋਇਲ, ਉੱਤਮਜੀਤ ਸਿੰਘ, ਡਾ. ਵੀ.ਕੇ. ਗੋਇਲ, ਕੰਵਰਜੀਤ ਸਿੰਘ, ਪ੍ਰਮੋਦ ਧਵਨ, ਭੁਪਿੰਦਰ ਸਿੰਘ, ਸਤਪਾਲ ਬਾਂਸਲ, ਦਲਬੀਰ ਸਿੰਘ, ਪਰਮਜੀਤ ਸਿੰਘ, ਪ੍ਰਭਜੋਤ ਸਿੰਘ ਅਤੇ ਪ੍ਰੇਮ ਗਰਗ ਆਦਿ ਹਾਜ਼ਰ ਸਨ।