ਕਰੋਨਾਵਾਇਰਸ: ਮੁਹਾਲੀ ਜ਼ਿਲ੍ਹੇ ਵਿੱਚ 44 ਹੋਰ ਨਵੇਂ ਕੇਸ ਸਾਹਮਣੇ ਆਏ, ਇਕ ਮੌਤ, 14 ਮਰੀਜ਼ਾਂ ਨੂੰ ਮਿਲੀ ਛੁੱਟੀ

ਮੁਹਾਲੀ ਜ਼ਿਲ੍ਹੇ ਵਿੱਚ ਕਰੋਨਾ ਪੀੜਤ ਮਰੀਜ਼ਾਂ ਦੀ ਗਿਣਤੀ ਵੱਧ ਕੇ 894 ’ਤੇ ਪੁੱਜੀ, 351 ਕੇਸ ਐਕਟਿਵ

ਨਬਜ਼-ਏ-ਪੰਜਾਬ ਬਿਊਰੋ, ਮੁਹਾਲੀ, 1 ਅਗਸਤ:
ਮੁਹਾਲੀ ਜ਼ਿਲ੍ਹੇ ਵਿੱਚ ਅੱਜ 44 ਹੋਰ ਨਵੇਂ ਮਾਮਲੇ ਸਾਹਮਣੇ ਆਏ ਹਨ। ਇਸ ਤਰ੍ਹਾਂ ਸਮੁੱਚੇ ਮੁਹਾਲੀ ਜ਼ਿਲ੍ਹੇ ਵਿੱਚ ਕਰੋਨਾ ਪੀੜਤ ਮਰੀਜ਼ਾਂ ਦੀ ਗਿਣਤੀ ਵੱਧ ਕੇ 894 ’ਤੇ ਪਹੁੰਚ ਗਈ ਹੈ। ਉਂਜ ਨਾਲ ਨਾਲ ਪੀੜਤ ਮਰੀਜ਼ ਸਿਹਤਯਾਬ ਹੋ ਕੇ ਆਪਣੇ ਘਰਾਂ ਵਿੱਚ ਪਰਤ ਰਹੇ ਹਨ। ਅੱਜ 14 ਮਰੀਜ਼ਾਂ ਨੂੰ ਠੀਕ ਹੋਣ ਉਪਰੰਤ ਛੁੱਟੀ ਦੇ ਕੇ ਘਰ ਭੇਜ ਦਿੱਤਾ ਹੈ। ਜਦੋਂਕਿ ਪਿੰਡ ਕਾਂਸਲ ਵਿੱਚ ਕਰੋਨਾ ਪੀੜਤ 65 ਸਾਲਾ ਬਜ਼ੁਰਗ ਦੀ ਮੌਤ ਹੋ ਗਈ। ਸ਼ੂਗਰ ਸਮੇਤ ਕਈ ਹੋਰ ਬਿਮਾਰੀਆਂ ਤੋਂ ਪੀੜਤ ਸੀ।
ਮੁਹਾਲੀ ਦੇ ਸਿਵਲ ਸਰਜਨ ਡਾ. ਮਨਜੀਤ ਸਿੰਘ ਨੇ ਦੱਸਿਆ ਕਿ ਇੱਥੋਂ ਦੇ ਫੇਜ਼-5 ਵਿੱਚ 33 ਸਾਲਾ ਪੁਰਸ਼, ਫੇਜ਼-6 ਵਿੱਚ 28 ਸਾਲਾ ਨੌਜਵਾਨ, ਫੇਜ਼-7 ਵਿੱਚ 35 ਸਾਲਾ ਪੁਰਸ਼, ਫੇਜ਼-9 ਵਿੱਚ 26 ਸਾਲ ਦੀ ਲੜਕੀ, ਫੇਜ਼-10 ਵਿੱਚ 34 ਸਾਲ ਦੀ ਅੌਰਤ, ਸੈਕਟਰ-69 ਵਿੱਚ 54 ਸਾਲ ਦੀ ਅੌਰਤ, ਸੈਕਟਰ-97 ਵਿੱਚ 15 ਸਾਲ ਦੀ ਲੜਕੀ ਅਤੇ 71 ਸਾਲ ਦੀ ਬਜ਼ੁਰਗ, ਬਲੌਂਗੀ ਵਿੱਚ 35 ਸਾਲਾ ਪੁਰਸ਼ ਤੇ 55 ਸਾਲ ਦੀ ਅੌਰਤ, ਪਿੰਡ ਕਾਂਸਲ ਵਿੱਚ 65 ਸਾਲ ਦਾ ਪੁਰਸ਼, ਨਵਾਂ ਗਾਉਂ ਵਿੱਚ 49 ਸਾਲਾ ਅੌਰਤ, ਮੀਰਪੁਰ ਵਿੱਚ 21 ਸਾਲ ਦੀ ਲੜਕੀ, ਰਾਣੀ ਮਾਜਰਾ ਵਿੱਚ 28 ਸਾਲਾ ਅੌਰਤ, ਸਿੰਘਪੁਰਾ ਵਿੱਚ 63 ਸਾਲਾ ਪੁਰਸ਼ ਦੀ ਕਰੋਨਾ ਰਿਪੋਰਟ ਪਾਜ਼ੇਟਿਵ ਆਈ ਹੈ।
ਇਸੇ ਤਰ੍ਹਾਂ ਖਰੜ ਵਿੱਚ ਤਿੰਨ ਅੌਰਤਾਂ ਸਮੇਤ 5 ਵਿਅਕਤੀ, ਕੁਰਾਲੀ ਵਿੱਚ 4 ਪੁਰਸ਼, ਪੀਰਮੁਛੱਲਾ ਵਿੱਚ 36 ਸਾਲਾ ਅੌਰਤ, ਢਕੋਲੀ ਵਿੱਚ 45 ਸਾਲਾ ਪੁਰਸ਼, ਬਨੂੜ ਵਿੱਚ 18 ਸਾਲ ਦੀ ਲੜਕੀ, ਜ਼ੀਰਕਪੁਰ ਵਿੱਚ 68 ਸਾਲ ਦੀ ਬਜ਼ੁਰਗ ਅੌਰਤ ਸਮੇਤ 4 ਵਿਅਕਤੀ, ਭਾਂਖਰਪੁਰ ਵਿੱਚ ਇਕ 62 ਸਾਲ ਦੀ ਅੌਰਤ ਸਣੇ ਚਾਰ ਲੋਕ, ਮੁਬਾਰਕਪੁਰ ਵਿੱਚ ਦੋ, ਡੇਰਾਬੱਸੀ ਵਿੱਚ ਚਾਰ ਵਿਅਕਤੀ, ਲਾਲੜੂ ਵਿੱਚ ਦੋ ਅੌਰਤਾਂ ਸਮੇਤ ਤਿੰਨ ਵਿਅਕਤੀ ਕਰੋਨਾ ਤੋਂ ਪੀੜਤ ਪਾਏ ਗਏ ਹਨ। ਉਧਰ, ਮੁਹਾਲੀ, ਬਲੌਂਗੀ, ਜ਼ੀਰਕਪੁਰ, ਡੇਰਾਬੱਸੀ ਅਤੇ ਖਰੜ ਨਾਲ ਸਬੰਧਤ 14 ਵਿਅਕਤੀਆਂ ਨੇ ਕਰੋਨਾ ਨੂੰ ਮਾਤ ਦਿੱਤੀ ਹੈ। ਇਨ੍ਹਾਂ ਸਾਰੇ ਵਿਅਕਤੀਆਂ ਨੂੰ ਅੱਜ ਹਸਪਤਾਲ ’ਚੋਂ ਛੁੱਟੀ ਦੇ ਕੇ ਘਰ ਭੇਜ ਦਿੱਤਾ ਗਿਆ ਹੈ।
ਸਿਵਲ ਸਰਜਨ ਨੇ ਦੱਸਿਆ ਕਿ ਮੁਹਾਲੀ ਜ਼ਿਲ੍ਹੇ ਵਿੱਚ ਹੁਣ ਕਰੋਨਾ ਪੀੜਤ ਮਰੀਜ਼ਾਂ ਦੀ ਗਿਣਤੀ ਵੱਧ ਕੇ 894 ’ਤੇ ਪਹੁੰਚ ਗਈ ਹੈ। ਜਿਨ੍ਹਾਂ ’ਚੋਂ ਹੁਣ ਤੱਕ 528 ਮਰੀਜ਼ ਠੀਕ ਹੋ ਚੁੱਕੇ ਹਨ ਅਤੇ ਹੁਣ ਤੱਕ 15 ਮਰੀਜ਼ਾਂ ਦੀ ਮੌਤ ਹੋ ਚੁੱਕੀ ਹੈ। ਇਸ ਸਮੇਂ ਮੁਹਾਲੀ ਜ਼ਿਲ੍ਹੇ ਵਿੱਚ 351 ਨਵੇਂ ਕੇਸ ਐਕਟਿਵ ਹਨ। ਪਿਛਲੇ 19 ਦਿਨਾਂ ਵਿੱਚ 501 ਨਵੇਂ ਕੇਸ ਸਾਹਮਣੇ ਆ ਚੁੱਕੇ ਹਨ। ਸਿਹਤ ਵਿਭਾਗ ਵੱਲੋਂ ਕਰੋਨਾ ਪੀੜਤ ਮਰੀਜ਼ਾਂ ਦੇ ਪਰਿਵਾਰਕ ਮੈਂਬਰਾਂ ਨੂੰ ਸਾਵਧਾਨੀ ਵਜੋਂ ਆਪਣੇ ਘਰਾਂ ਵਿੱਚ ਇਕਾਂਤਵਾਸ ਵਿੱਚ ਰਹਿਣ ਲਈ ਕਿਹਾ ਗਿਆ ਹੈ।