ਡੀਸੀ ਵੱਲੋਂ ਨਵੀਂ ਏਸੀ ਮੰਡੀ ਨੂੰ ਤੁਰੰਤ ਪ੍ਰਭਾਵ ਨਾਲ ਵਰਤੋਂ ਵਿੱਚ ਲਿਆਉਣ ਦੇ ਹੁਕਮ

ਡੀਸੀ ਵੱਲੋਂ ਨਵੀਂ ਏਸੀ ਮੰਡੀ ਨੂੰ ਤੁਰੰਤ ਪ੍ਰਭਾਵ ਨਾਲ ਵਰਤੋਂ ਵਿੱਚ ਲਿਆਉਣ ਦੇ ਹੁਕਮ

ਪੁਰਾਣਾ ਮੁਹਾਲੀ ਪਿੰਡ ਫੇਜ਼-1 ਦੀ ਮੰਡੀ ਵਿੱਚ ਭੀੜ ਨੂੰ ਘੱਟ ਕਰਨ ਲਈ ਚੁੱਕਿਆ ਕਦਮ

ਪੱਤਰ ਪ੍ਰੇਰਕ
ਨਬਜ਼-ਏ-ਪੰਜਾਬ ਬਿਊਰੋ, ਐਸ.ਏ.ਐਸ. ਨਗਰ (ਮੁਹਾਲੀ), 3 ਅਪਰੈਲ
ਜ਼ਿਲ੍ਹਾ ਪ੍ਰਸ਼ਾਸਨ ਨੇ ਲੋਕਹਿੱਤਾਂ ਨੂੰ ਦੇਖਦਿਆਂ ਇੱਥੋਂ ਦੇ ਫੇਜ਼-11 ਸਥਿਤ ਨਵੀਂ ਏਸੀ ਮੰਡੀ ਨੂੰ ਤੁਰੰਤ ਪ੍ਰਭਾਵ ਨਾਲ ਵਰਤੋਂ ਵਿੱਚ ਲਿਆਉਣ ਸਬੰਧੀ ਫੈਸਲਾ ਲਿਆ ਹੈ। ਇਹ ਪ੍ਰਗਟਾਵਾ ਕਰਦਿਆਂ ਮੁਹਾਲੀ ਦੇ ਡਿਪਟੀ ਕਮਿਸ਼ਨਰ ਗਿਰੀਸ਼ ਦਿਆਲਨ ਨੇ ਦੱਸਿਆ ਕਿ ਇਹ ਕਦਮ ਪੁਰਾਣਾ ਮੁਹਾਲੀ ਪਿੰਡ ਫੇਜ਼-1 ਦੀ ਸਬਜ਼ੀ ਮੰਡੀ ਵਿੱਚ ਜ਼ਿਆਦਾ ਭੀੜ ਹੋਣ ਦੀ ਸੂਰਤ ਵਿੱਚ ਚੁੱਕਿਆ ਗਿਆ ਹੈ ਜੋ ਇਕ ਥੋਕ ਬਾਜ਼ਾਰ, ਜਿੱਥੋਂ ਪੂਰੇ ਸ਼ਹਿਰ ਨੂੰ ਫਲ ਅਤੇ ਸਬਜ਼ੀਆਂ ਦੀ ਸਪਲਾਈ ਕੀਤੀ ਜਾਂਦੀ ਹੈ ਅਤੇ ਉੱਥੇ ਸਮਾਜਿਕ ਦੂਰੀ ਬਣਾਈ ਰੱਖਣਾ ਸੰਭਵ ਨਹੀਂ ਹੈ। ਇਸ ਲਈ ਸਥਿਤੀ ਦੇ ਖਤਰੇ ਨੂੰ ਦੇਖਦਿਆਂ ਮੌਜੂਦਾ ਮੰਡੀ ਦੇ ਕੰਮ ਨੂੰ ਘੱਟ ਕਰਕੇ ਭੀੜ ਨੂੰ ਘਟਾਉਣ ਲਈ ਅਤੇ ਜਨਤਕ ਹਿੱਤਾਂ ਲਈ ਸਮਾਜਿਕ ਦੂਰੀਆਂ ਬਣਾਈ ਰੱਖਣ ਲਈ ਕੁਝ ਜਾਂ ਸਾਰੇ ਹੀ ਲਾਇਸੈਂਸੀਆਂ ਨੂੰ ਫੇਜ਼-11 ਦੀ ਨਵੀਂ ਏਸੀ ਮੰਡੀ ਵਿੱਚ ਤੁਰੰਤ ਤਬਦੀਲ ਕਰਨ ਸਬੰਧੀ ਹਦਾਇਤ ਕੀਤੀ ਗਈ। ਜ਼ਿਕਰਯੋਗ ਹੈ ਕਿ ਫੇਜ਼-11 ਵਿੱਚ ਨਵੀਂ ਮੰਡੀ ਅਧੀਨ ਲਗਭਗ 15 ਏਕੜ ਦਾ ਵਿਸ਼ਾਲ ਰਕਬਾ ਹੈ ਅਤੇ ਇਸ ਵਿਚ 95 ਦੁਕਾਨਾਂ ਹਨ ਜਿਨ੍ਹਾਂ ਨੂੰ ਕੰਮਕਾਜ ਵਿੱਚ ਤਬਦੀਲ ਕਰਨ ਲਈ ਵਰਤਿਆ ਜਾ ਸਕਦਾ ਹੈ।