ਨਵੇਂ ਮੇਅਰ ਦੀ ਅਗਵਾਈ ਹੇਠ ਵਿਕਾਸਮੁਖੀ ਬਜਟ ਨਾਲ ਨਵਾਂ ਨਰੋਆ ਹੋਵੇਗਾ ਸ਼ਹਿਰ ਮੁਹਾਲੀ: ਕੁਲਜੀਤ ਬੇਦੀ

ਨਵੇਂ ਮੇਅਰ ਦੀ ਅਗਵਾਈ ਹੇਠ ਵਿਕਾਸਮੁਖੀ ਬਜਟ ਨਾਲ ਨਵਾਂ ਨਰੋਆ ਹੋਵੇਗਾ ਸ਼ਹਿਰ ਮੁਹਾਲੀ: ਕੁਲਜੀਤ ਬੇਦੀ

ਸ਼ਹਿਰ ਮੁਹਾਲੀ ਦੇ ਵਿਕਾਸ ਲਈ ਸਰਕਾਰ ਤੋਂ ਹੋਰ ਗਰਾਂਟ ਲਿਆਉਣ ਦੇ ਲਈ ਵੀ ਯਤਨਸ਼ੀਲ ਹਨ ਬਲਬੀਰ ਸਿੱਧੂ

ਨਬਜ਼-ਏ-ਪੰਜਾਬ ਬਿਊਰੋ, ਮੁਹਾਲੀ, 1 ਅਪਰੈਲ:
ਸ਼ਹਿਰ ਦੇ ਲੋਕ ਮਸਲਿਆਂ ਨੂੰ ਹੱਲ ਕਰਵਾਉਣ ਲਈ ਪਿਛਲੇ ਲੰਬੇ ਸਮੇਂ ਤੋਂ ਲਗਾਤਾਰ ਯਤਨਸ਼ੀਲ ਨਗਰ ਨਿਗਮ ਮੋਹਾਲੀ ਦੇ ਕਾਂਗਰਸੀ ਕੌਂਸਲਰ ਕੁਲਜੀਤ ਸਿੰਘ ਬੇਦੀ ਨੇ ਨਿਗਮ ਅਧਿਕਾਰੀਆਂ ਵੱਲੋਂ ਪੇਸ਼ ਕੀਤੇ ਨਵੇਂ ਬਜਟ ਨੂੰ ਵਿਕਾਸਮੁਖੀ ਦੱਸਦਿਆਂ ਸ਼ਲਾਘਾ ਕੀਤੀ ਹੈ। ਉਨ੍ਹਾਂ ਕਿਹਾ ਕਿ ਬਹੁਤ ਜਲਦ ਨਗਰ ਨਿਗਮ ਵਿੱਚ ਬਣਨ ਜਾ ਰਹੇ ਕਾਂਗਰਸ ਪਾਰਟੀ ਦੇ ਨਵੇਂ ਮੇਅਰ ਦੀ ਯੋਗ ਅਗਵਾਈ ਹੇਠ ਇਸ ਵਿਕਾਸਮੁਖੀ ਬਜਟ ਨਾਲ ਮੋਹਾਲੀ ਸ਼ਹਿਰ ਵਿਕਾਸ ਪੱਖੋਂ ਨਵਾਂ ਨਰੋਆ ਹੋਵੇਗਾ।
ਕੌਂਸਲਰ ਕੁਲਜੀਤ ਸਿੰਘ ਬੇਦੀ ਨੇ ਕਿਹਾ ਕਿ ਕੈਬਨਿਟ ਮੰਤਰੀ ਬਲਬੀਰ ਸਿੰਘ ਸਿੱਧੂ ਦੀ ਅਗਵਾਈ ਹੇਠ ਪਹਿਲਾਂ ਤੋਂ ਹੀ ਵਿਕਾਸ ਕਾਰਜਾਂ ਵਿੱਚ ਅੱਗੇ ਚੱਲ ਰਿਹਾ ਸ਼ਹਿਰ ਮੁਹਾਲੀ ਇਸ ਨਵੇਂ ਬਜਟ ਨਾਲ ਵਿਕਾਸ ਪੱਖੋਂ ਹੋਰ ਤੇਜ਼ੀ ਫੜੇਗਾ। ਉਨ੍ਹਾਂ ਕਿਹਾ ਕਿ ਕਰੋਨਾ ਮਹਾਮਾਰੀ ਦੇ ਦੌਰ ਵਿੱਚ ਭਾਵੇਂ ਨਗਰ ਨਿਗਮ ਨੂੰ ਪ੍ਰਾਪਰਟੀ ਟੈਕਸ ਅਤੇ ਇਸ਼ਤਿਹਾਰਬਾਜ਼ੀ ਤੋਂ ਆਮਦਨ ਕਾਫ਼ੀ ਘਟੀ ਹੈ ਪ੍ਰੰਤੂ ਇਸ ਦੇ ਬਾਵਜੂਦ ਪਿਛਲੇ ਸਾਲ ਦੇ 125 ਕਰੋੜ ਦੇ ਬਜਟ ਦੇ ਮੁਕਾਬਲੇ ਇਸ ਵਾਰ ਸਾਲ 2021-22 ਲਈ 146.63 ਕਰੋੜ ਰੁਪਏ ਦਾ ਬਜਟ ਤਿਆਰ ਕੀਤਾ ਗਿਆ ਹੈ, ਜਿਸ ’ਚੋਂ 109.90 ਕਰੋੜ ਰੁਪਏ ਸ਼ਹਿਰ ਦੇ ਵਿਕਾਸ ਕਾਰਜਾਂ ਉੱਤੇ ਖਰਚ ਕੀਤੇ ਜਾਣਗੇ।
ਉਨ੍ਹਾਂ ਕਿਹਾ ਕਿ ਨਵੇਂ ਮੇਅਰ ਦੀ ਅਗਵਾਈ ਵਿੱਚ ਉਕਤ ਬਜਟ ਵਿੱਚ ਗਮਾਡਾ ਤੋਂ ਮਿਲਣ ਵਾਲੇ ਵਿਕਾਸ ਫੰਡ ਦੀ ਰਾਸ਼ੀ 25 ਕਰੋੜ ਤੋਂ ਵਧਾਉਣ ਦੇ ਯਤਨ ਕੀਤੇ ਜਾਣਗੇ ਅਤੇ ਕੈਬਨਿਟ ਮੰਤਰੀ ਬਲਬੀਰ ਸਿੰਘ ਸਿੱਧੂ ਵੱਲੋਂ ਪੰਜਾਬ ਸਰਕਾਰ ਕੋਲੋਂ ਸ਼ਹਿਰ ਦੇ ਵਿਕਾਸ ਲਈ ਹੋਰ ਗਰਾਂਟ ਲਿਆਉਣ ਦੇ ਯਤਨ ਕੀਤੇ ਜਾਣਗੇ। ਸ੍ਰੀ ਬੇਦੀ ਨੇ ਕਿਹਾ ਕਿ ਸ਼ਹਿਰ ਦੇ ਵਿਕਾਸ ਨਾਲ ਕਿਸੇ ਵੀ ਕਿਸਮ ਦਾ ਸਮਝੌਤਾ ਨਹੀਂ ਕੀਤਾ ਜਾਵੇਗਾ। ਕੁਝ ਹੋਰ ਨਵੇਂ ਢੰਗ ਸੋਚੇ ਜਾਣਗੇ ਜਿਨ੍ਹਾਂ ਨਾਲ ਸ਼ਹਿਰ ਮੁਹਾਲੀ ਨੂੰ ਹੋਰ ਬੁਲੰਦੀਆਂ ਉਤੇ ਪਹੁੰਚਾਇਆ ਜਾ ਸਕੇ।