ਸਰਕਾਰੀ ਕਾਲਜ ਵਿੱਚ ‘ਨਸ਼ੇ ਭਜਾਓ ਪੌਸ਼ਟਿਕ ਭੋਜਨ ਅਪਣਾਓ’ ਵਿਸ਼ੇ ਨੂੰ ਸਮਰਪਿਤ ਦੀਵਾਲੀ ਮੇਲਾ

ਸਰਕਾਰੀ ਕਾਲਜ ਵਿੱਚ ‘ਨਸ਼ੇ ਭਜਾਓ ਪੌਸ਼ਟਿਕ ਭੋਜਨ ਅਪਣਾਓ’ ਵਿਸ਼ੇ ਨੂੰ ਸਮਰਪਿਤ ਦੀਵਾਲੀ ਮੇਲਾ

ਨਬਜ਼-ਏ-ਪੰਜਾਬ ਬਿਊਰੋ, ਮੁਹਾਲੀ, 23 ਅਕਤੂਬਰ:
ਇੱਥੋਂ ਦੇ ਸਰਕਾਰੀ ਕਾਲਜ ਫੇਜ਼-6 ਵਿੱਚ ਹੋਮ ਸਾਇੰਸ ਵਿਭਾਗ ਵੱਲੋਂ ‘ਨਸ਼ੇ ਭਜਾਓ ਪੌਸ਼ਟਿਕ ਭੋਜਨ ਅਪਣਾਓ’ ਵਿਸ਼ੇ ਨੂੰ ਸਮਰਪਿਤ ਦੀਵਾਲੀ ਮੇਲਾ ਧੂਮਧਾਮ ਨਾਲ ਮਨਾਇਆ ਗਿਆ ਅਤੇ ਗਰੀਨ ਦੀਵਾਲੀ ਅਤੇ ਪਟਾਕੇ ਰਹਿਤ ਦੀਵਾਲੀ ਮਨਾਉਣ ਦਾ ਸੁਨੇਹਾ ਦਿੰਦੀਆਂ ਵੱਖ ਵੱਖ ਪ੍ਰਦਰਸ਼ਨੀਆਂ ਵੀ ਲਗਾਈਆਂ ਗਈਆਂ। ਕਾਲਜ ਦੀ ਪ੍ਰਿੰਸੀਪਲ ਸ੍ਰੀਮਤੀ ਕੋਮਲ ਬਰੋਕਾ ਨੇ ਦੀਵਾਲੀ ਮੇਲੇ ਦਾ ਉਦਘਾਟਨ ਕਰਨ ਉਪਰੰਤ ਵੱਖ-ਵੱਖ ਸਟਾਲਾਂ ਦਾ ਨਿਰੀਖਣ ਕੀਤਾ। ਇਸ ਮੌਕੇ ਉਨ੍ਹਾਂ ਵਿਦਿਆਰਥੀਆਂ ਨੂੰ ਨਸ਼ੇ ਤਿਆਗਣ ਅਤੇ ਪੌਸ਼ਟਿਕ ਭੋਜਨ ਅਪਣਾਉਣ ’ਤੇ ਜ਼ੋਰ ਦਿੰਦਿਆਂ ਨੌਜਵਾਨਾਂ ਨੂੰ ਛੋਟੇ-ਛੋਟੇ ਕਿੱਤੇ ਸਿੱਖ ਕੇ ਰੁਜ਼ਗਾਰ ਖੋਲ੍ਹਣ ਲਈ ਪ੍ਰੇਰਿਤ ਕੀਤਾ। ਉਨ੍ਹਾਂ ਵਿਦਿਆਰਥੀਆਂ ਨੂੰ ਅਪੀਲ ਕੀਤੀ ਕਿ ਵਾਤਾਵਰਨ ਨੂੰ ਪ੍ਰਦੂਸ਼ਿਤ ਹੋਣ ਤੋਂ ਬਚਾਉਣ ਲਈ ਪਟਾਕੇ ਰਹਿਣ ਦੀਵਾਲੀ ਮਨਾਈ ਜਾਵੇ ਅਤੇ ਨਸ਼ਿਆਂ ਤੋਂ ਦੂਰ ਰਹਿ ਕੇ ਨਰੋਏ ਸਮਾਜ ਦੀ ਸਿਰਜਣਾ ਲਈ ਵਡਮੁੱਲਾ ਯੋਗਦਾਨ ਪਾਇਆ ਜਾਵੇ।
ਸਰਕਾਰੀ ਕਾਲਜ ਦੇ ਬੁਲਾਰੇ ਨੇ ਦੱਸਿਆ ਕਿ ਦੀਵਾਲੀ ਮੇਲੇ ਵਿੱਚ ਸਾਇੰਸ ਵਿਭਾਗ ਦੇ ਵੱਖ-ਵੱਖ ਵਿਦਿਆਰਥੀਆਂ ਨੇ ਹੁਨਰ ਟੂ ਰੁਜ਼ਗਾਰ ਕਲੱਬ ਦੇ ਅਧੀਨ ਸਜਾਵਟੀ ਸਮਾਜ ਦੀ ਪ੍ਰਦਰਸ਼ਨੀ ਲਗਾਈ ਗਈ। ਜਿਸ ਵਿੱਚ ਸਜਾਵਟੀ ਦੀਵੇ, ਕਲਰ ਬੁਰਾਦਾ, ਕੁਸ਼ਨ, ਕੱਪੜੇ ਦੇ ਬੈਗ, ਗਲਾਸ ਪੇਂਟਿੰਗ ਬੋਤਲਾਂ ਦੀ ਸਜਾਵਟ ਅਤੇ ਪੱਖੀਆਂ ਪੀੜੀਆਂ ਪੇਸ਼ ਕੀਤੇ ਗਏ।