ਡੀਐਸਪੀ ਨੇ ਗਾਇਕ ਕਰਨ ਅੌਜਲਾ ਨੂੰ ਪੜ੍ਹਾਇਆ ਟਰੈਫ਼ਿਕ ਨਿਯਮਾਂ ਦਾ ਪਾਠ

ਡੀਐਸਪੀ ਨੇ ਗਾਇਕ ਕਰਨ ਅੌਜਲਾ ਨੂੰ ਪੜ੍ਹਾਇਆ ਟਰੈਫ਼ਿਕ ਨਿਯਮਾਂ ਦਾ ਪਾਠ

ਟਰੈਫ਼ਿਕ ਨਿਯਮਾਂ ਦੀ ਧੱਜੀਆਂ ਉਡਾਉਣ ਦੇ ਦੋਸ਼ ਵਿੱਚ ਅੱਠ ਵਾਹਨਾਂ ਦੇ ਚਲਾਨ

ਨਬਜ਼-ਏ-ਪੰਜਾਬ ਬਿਊਰੋ, ਮੁਹਾਲੀ, 2 ਦਸੰਬਰ:
ਮੁਹਾਲੀ ਪੁਲੀਸ ਨੇ ਸ਼ਰ੍ਹੇਆਮ ਨਿਯਮਾਂ ਦੀ ਧੱਜੀਆਂ ਉਡਾਣ ਦੇ ਦੋਸ਼ ਵਿੱਚ ਮਸ਼ਹੂਰ ਗਾਇਕ ਕਰਨ ਅੌਜਲਾ ਦੇ ਨਾਲ ਕਾਫਲੇ ਵਿੱਚ ਚੱਲਣ ਵਾਲੀਆਂ ਕਰੀਬ ਅੱਠ ਗੱਡੀਆਂ ਦੇ ਚਲਾਨ ਕੀਤੇ ਗਏ। ਇਸ ਤੋਂ ਪਹਿਲਾਂ ਡੀਐਸਪੀ (ਟਰੈਫ਼ਿਕ) ਗੁਰਇਕਬਾਲ ਸਿੰਘ ਨੇ ਗਾਇਕ ਕਰਨ ਅੌਜਲਾ ਨੂੰ ਟਰੈਫ਼ਿਕ ਨਿਯਮਾਂ ਦਾ ਪਾਠ ਪੜ੍ਹਾਇਆ। ਸੀਸੀਟੀਵੀ ਕੈਮਰੇ ਦੀ ਫੁਟੇਜ ਨੂੰ ਚੈੱਕ ਕਰਨ ਬਾਅਦ ਜਿਨ੍ਹਾਂ ਵਾਹਨਾਂ ਦੇ ਚਲਾਨ ਕੀਤੇ ਗਏ ਹਨ। ਵਾਹਨ ਚਾਲਕਾਂ ’ਤੇ ਖਤਰਨਾਕ ਡਰਾਈਵਿੰਗ ਕਰਨਾ, ਪ੍ਰੈਸ਼ਰ ਹਾਰਨ, ਸੜਕ ਵਿਚਕਾਰ ਡਿਵਾਈਡਰ ਪੱਟੀ ਦੇ ਇੱਧਰ ਉਧਰ ਤੇਜ਼ ਰਫ਼ਤਾਰ ਵਿੱਚ ਗੱਡੀ ਚਲਾਉਣਾ, ਉੱਚੀ ਆਵਾਜ਼ ਵਿੱਚ ਮਿਊਜ਼ਿਕ ਚਲਾਉਣ ਆਦਿ ਜੁਰਮ ਮੜੇ ਗਏ ਹਨ।
ਜਾਣਕਾਰੀ ਅਨੁਸਾਰ ਬੀਤੀ 22 ਨਵੰਬਰ ਨੂੰ ਗਾਇਕ ਕਰਨ ਅੌਜਲਾ ਕੈਨੇਡਾ ਤੋਂ ਵਾਪਸ ਪਰਤਿਆਂ ਸੀ। ਇਸ ਦੌਰਾਨ ਗਾਇਕ ਦੇ ਕਾਫ਼ਲੇ ਵਿੱਚ ਸ਼ਾਮਲ ਵਾਹਨ ਚਾਲਕਾਂ ਨੇ ਮੁਹਾਲੀ ਏਅਰਪੋਰਟ ਸੜਕ ’ਤੇ ਸ਼ਰ੍ਹੇਆਮ ਟਰੈਫ਼ਿਕ ਨਿਯਮਾਂ ਦੀਆਂ ਧੱਜੀਆਂ ਉਡਾਉਂਦੇ ਹੋਏ ਉੱਚੀ ਆਵਾਜ਼ ਵਿੱਚ ਮਿਊਜ਼ਿਕ ਚਲਾਉਂਦੇ ਹੋਏ ਤੇਜ਼ ਰਫ਼ਤਾਰੀ ਨਾਲ ਸੜਕ ’ਤੇ ਵਾਹਨ ਦੌੜਾਏ ਗਏ। ਜਿਸ ਕਾਰਨ ਆਵਾਜਾਈ ਵੀ ਪ੍ਰਭਾਵਿਤ ਹੋਈ ਸੀ। ਇਹ ਗੱਲ ਮੀਡੀਆ ਵਿੱਚ ਆਉਣ ’ਤੇ ਮੁਹਾਲੀ ਪੁਲੀਸ ਵੱਲੋਂ ਗਾਇਕ ਨੂੰ ਤਲਬ ਕੀਤਾ ਗਿਆ ਸੀ। ਅੱਜ ਗਾਇਕ ਕਰਨ ਅੌਜਲਾ ਨੇ ਆਪਣੇ ਵੱਡੇ ਭਰਾ ਅਤੇ ਦੋਸਤਾਂ ਨਾਲ ਮੁਹਾਲੀ ਦੇ ਡੀਐਸਪੀ (ਟਰੈਫ਼ਿਕ) ਗੁਰਇਕਬਾਲ ਸਿੰਘ ਦੇ ਦਫ਼ਤਰ ਵਿੱਚ ਪਹੁੰਚ ਕੇ ਖ਼ਿਮਾ ਯਾਚਨਾ ਕੀਤੀ। ਪੁਲੀਸ ਨੇ ਕਰੀਬ ਅੱਧ ਘੰਟੇ ਤੱਕ ਪੁੱਛਗਿੱਛ ਕੀਤੀ। ਗਾਇਕ ਨੇ ਆਪਣੇ ਬਿਆਨਾਂ ਵਿੱਚ ਕਿਹਾ ਕਿ ਉਸ ਨੇ ਆਪਣੇ ਪ੍ਰਸੰਸਾਂ ਦੀ ਕੋਈ ਭੀੜ ਇਕੱਠੀ ਨਹੀਂ ਕੀਤੀ ਸੀ। ਇਹ ਲੋਕ ਉਸ ਦੇ ਵਾਪਸ ਆਉਣ ਦੀ ਸੂਚਨਾ ਮਿਲਣ ’ਤੇ ਖ਼ੁਦ ਹੀ ਵੱਡੀ ਗਿਣਤੀ ਵਿੱਚ ਇੱਥੇ ਪਹੁੰਚ ਗਏ ਸੀ। ਉਨ੍ਹਾਂ ਆਪਣਾ ਪੱਖ ਰੱਖਦਿਆਂ ਕਿਹਾ ਕਿ ਇਹ ਸਾਰਾ ਕੁਝ ਕਿਸੇ ਗਿਣੀ ਮਿੱਥੀ ਸਾਜਿਸ਼ ਅਧੀਨ ਨਹੀਂ ਹੋਇਆ।