ਮੁਹਾਲੀ ਵਿੱਚ ਦਿਨ ਦਿਹਾੜੇ ਨੌਜਵਾਨ ਤੋਂ 50 ਹਜ਼ਾਰ ਦੀ ਨਗਦੀ ਲੁੱਟੀ

ਮੁਹਾਲੀ ਵਿੱਚ ਦਿਨ ਦਿਹਾੜੇ ਨੌਜਵਾਨ ਤੋਂ 50 ਹਜ਼ਾਰ ਦੀ ਨਗਦੀ ਲੁੱਟੀ

ਨਬਜ਼-ਏ-ਪੰਜਾਬ ਬਿਊਰੋ, ਮੁਹਾਲੀ, 9 ਫਰਵਰੀ:
ਸਥਾਨਕ ਫੇਜ਼-1 ਵਿੱਚ ਅੱਜ ਤਿੰਨ ਕਾਰ ਸਵਾਰਾਂ ਨੇ ਦਿਨ ਦਿਹਾੜੇ ਇੱਕ ਨੌਜਵਾਨ ਤੋਂ 49 ਹਜ਼ਾਰ 500 ਰੁਪਏ ਖੋਹ ਲਏ ਅਤੇ ਫਰਾਰ ਹੋ ਗਏ। ਪ੍ਰਾਪਤ ਜਾਣਕਾਰੀ ਫੇਜ਼-1ਵਿੱਚ ਕਿਸੇ ਦੁਕਾਨ ਉਪਰ ਨੌਕਰੀ ਕਰਨ ਵਾਲਾ ਅਰਜੁਨ ਕੁਮਾਰ ਸਟੇਟ ਬੈਂਕ ਆਫ ਇੰਡੀਆ ਫੇਜ਼-1 ਵਿੱਚ 80 ਹਜਾਰ ਰੁਪਏ ਜਮਾਂ ਕਰਵਾਉਣ ਜਾ ਰਿਹਾ ਸੀ ਜੋ ਕਿ ਉਸ ਦੇ ਕੱਪੜਿਆਂ ਦੀ ਵੱਖ-ਵੱਖ ਜੇਬਾਂ ਵਿਚ ਸਨ। ਬੈਂਕ ਦੇ ਸਾਹਮਣੇ ਉਸ ਨੂੰ ਇੰਡੀਕਾ ਕਾਰ ਵਿਚ ਸਵਾਰ ਦੋ ਵਿਅਕਤੀ ਮਿਲੇ, ਜਿਨ੍ਹਾਂ ਨੇ ਕਿਹਾ ਕਿ ਉਨ੍ਹਾਂ ਕੋਲ ਛੋਟੇ ਨੋਟ ਹਨ ਅਤੇ ਉਹ ਉਹਨਾਂ ਤੋਂ ਛੋਟੇ ਨੋਟ ਲੈ ਕੇ ਵੱਡੇ ਨੋਟ ਦੇ ਦੇਵੇ। ਉਹਨਾਂ ਕਾਰ ਸਵਾਰਾਂ ਨੇ ਅਰਜੁਨ ਨੂੰ ਗੱਲਾਂ ਵਿੱਚ ਲਗਾ ਕੇ ਕਾਰ ਵਿਚ ਆਪਣੇ ਨਾਲ ਬੈਠਾ ਲਿਆ ਪਰ ਉਹ ਕਾਰ ਸਵਾਰ ਉਸ ਨੂੰ ਜੋ ਨੋਟ ਦੇ ਰਹੇ ਸਨ ਉਹਨਾਂ ਨੋਟਾਂ ਦੀਆਂ ਗੱਡੀਆਂ ਵਿੱਚ ਉੱਪਰ ਹੇਠਾਂ ਤਾਂ ਨੋਟ ਸਨ ਪਰ ਵਿੱਚ ਖਾਲੀ ਕਾਗਜ ਸਨ। ਇਹ ਦੇਖ ਕੇ ਅਰਜੁਨ ਨੇ ਰੌਲਾ ਪਾ ਦਿਤਾਅਤੇ ਇਸ ਦੌਰਾਨ ਕਾਰ ਸਵਾਰ ਉਸਦੇ ਸਮੇਤ ਕਾਰ ਭਜਾ ਕੇ ਲੈ ਗਏ ਅਤੇ ਉਸ ਕੋਲੋਂ ਜਬਰਦਸਤੀ ਪੈਸੇ ਖੋਹਣ ਲੱਗ ਪਏ। ਇਸ ਦੌਰਾਨ ਦੋਵਾਂ ਕਾਰ ਸਵਾਰਾਂ ਨੇ ਉਸ ਤੋਂ 49,500 ਰੁਪਏ ਖੋਹ ਲਏ। ਪ੍ਰਾਪਤ ਜਾਣਕਾਰੀ ਅਨੁਸਾਰ ਅਰਜੁਨ ਦੇ ਰੌਲਾ ਪਾਉਣ ਦੌਰਾਨ ਇਕ ਮੋਟਰ ਸਾਇਕਲ ਸਵਾਰ ਉਨ੍ਹਾਂ ਦੇ ਮਗਰ ਲੱਗ ਗਿਆ ਅਤੇ ਉਸਨੇ ਪੁਲੀਸ ਨੂੰ ਫੋਨ ਕਰ ਦਿੱਤਾ। ਇਹ ਦੇਖ ਕੇ ਕਾਰ ਸਵਾਰ ਇਕ ਫੇਜ ਦੇ ਬੈਰੀਅਰ ਕੋਲ ਅਰਜੁਨ ਕੁਮਾਰ ਨੂੰ ਚਲਦੀ ਕਾਰ ’ਚੋਂ ਹੀ ਸੁੱਟ ਕੇ ਫਰਾਰ ਹੋ ਗਏ। ਅਰਜਨ ਇਸ ਸਮੇਂ ਜ਼ਖ਼ਮੀ ਹਾਲਤ ਵਿਚ ਫੇਜ਼-6 ਦੇ ਸਰਕਾਰੀ ਹਸਪਤਾਲ ਵਿਚ ਜੇਰੇ ਇਲਾਜ ਹੈ। ਪੁਲੀਸ ਨੇ ਮੌਕੇ ਉਪਰ ਪਹੁੰਚ ਕੇ ਜਾਂਚ ਸ਼ੁਰੂ ਕਰ ਦਿਤੀ ਹੈ।