ਮੁਹਾਲੀ ਪੁਲੀਸ ਨੇ ਗੁੰਮਸ਼ੁਦਾ ਅੌਰਤ ਤੇ ਬੱਚੇ ਦੀ 24 ਘੰਟਿਆਂ ਅੰਦਰ ਕੀਤੀ ਭਾਲ

ਮੁਹਾਲੀ ਪੁਲੀਸ ਨੇ ਗੁੰਮਸ਼ੁਦਾ ਅੌਰਤ ਤੇ ਬੱਚੇ ਦੀ 24 ਘੰਟਿਆਂ ਅੰਦਰ ਕੀਤੀ ਭਾਲ

ਘਰੇਲੂ ਕਲੇਸ਼ ਦੇ ਚੱਲਦਿਆਂ ਘਰ ਤੋਂ ਭੇਤਭਰੀ ਹਾਲਤ ’ਚ ਲਾਪਤਾ ਸਨ ਮਾਂ-ਪੁੱਤ

ਨਵੀਂ ਟੈਕਨਾਲੋਜੀ ਦੀ ਮਦਦ ਨਾਲ ਟਰੇਸ ਕੀਤਾ ਗੁੰਮਸ਼ੁਦਾ ਮਾਂ-ਪੁੱਤ ਨੂੰ

ਨਬਜ਼-ਏ-ਪੰਜਾਬ ਬਿਊਰੋ, ਮੁਹਾਲੀ, 30 ਜਨਵਰੀ:
ਜ਼ਿਲ੍ਹਾ ਪੁਲੀਸ ਮੁਹਾਲੀ ਨੇ 24 ਘੰਟਿਆਂ ਵਿੱਚ ਗੁੰਮਸ਼ੁਦਾ ਅੌਰਤ ਅਤੇ ਉਸ ਦੀ ਬੱਚੇ ਦੀ ਭਾਲ ਕਰਨ ਵਿੱਚ ਸਫਲਤਾ ਹਾਸਲ ਕੀਤੀ ਹੈ। ਅੱਜ ਸ਼ਾਮ ਇਹ ਜਾਣਕਾਰੀ ਮੁਹਾਲੀ ਦੇ ਐਸਪੀ (ਟਰੈਫ਼ਿਕ) ਗੁਰਜੋਤ ਸਿੰਘ ਕਲੇਰ ਨੇ ਦਿੱਤੀ। ਉਨ੍ਹਾਂ ਦੱਸਿਆ ਕਿ ਮਟੌਰ ਥਾਣੇ ਦੇ ਵਿੱਚ ਦੀਪਤੀ ਜੋਸ਼ੀ ਅਤੇ ਉਸ ਦੇ ਬੱਚੇ ਬਾਰੇ ਭੇਤਭਰੀ ਹਾਲਤ ਵਿੱਚ ਲਾਪਤਾ ਹੋਣ ਸਬੰਧੀ ਰਿਪੋਰਟ ਦਰਜ ਕਰਵਾਈ ਗਈ ਸੀ। ਗੁੰਮਸ਼ੁਦਗੀ ਰਿਪੋਰਟ ਦੀਪਤੀ ਜੋਸ਼ੀ ਦੇ ਪਤੀ ਨੇ ਦਰਜ ਕਰਵਾਈ ਸੀ।
ਐਸਪੀ ਗੁਰਜੋਤ ਕਲੇਰ ਨੇ ਦੱਸਿਆ ਕਿ ਪੁਲੀਸ ਟੀਮ ਵੱਲੋਂ ਸ਼ਹਿਰ ਦੇ ਸਮੂਹ ਮੰਦਰਾਂ ਅਤੇ ਗੁਰਦੁਆਰਿਆਂ ਵਿੱਚ ਲਾਪਤਾ ਮਾਂ-ਪੁੱਤ ਦੀ ਭਾਲ ਕੀਤੀ ਗਈ ਪ੍ਰੰਤੂ ਜਦੋਂ ਗੁੰਮਸ਼ੁਦਾ ਅੌਰਤ ਅਤੇ ਉਸ ਦੇ ਬੱਚੇ ਬਾਰੇ ਕੋਈ ਸੁਰਾਗ ਨਹੀਂ ਮਿਲਿਆ ਤਾਂ ਉਸ ਦੇ ਪੁਰਾਣੇ ਸੰਪਰਕਾਂ ਨਾਲ ਗੱਲਬਾਤ ਕੀਤੀ ਗਈ। ਲੇਕਿਨ ਦੀਪਤੀ ਦਾ ਮੋਬਾਈਲ ਫੋਨ ਬੰਦ ਆ ਰਿਹਾ ਸੀ। ਇਸ ਦੇ ਚੱਲਦਿਆਂ ਉਨ੍ਹਾਂ ਨੂੰ ਲੱਭਣਾ ਕਾਫ਼ੀ ਮੁਸ਼ਕਲ ਕੰਮ ਸੀ। ਇਸ ਤਰ੍ਹਾਂ ਪੁਲੀਸ ਨੇ ਆਪਣੀਆਂ ਸਾਈਬਰ ਸੈੱਲ ਦੀਆਂ ਵੱਖ-ਵੱਖ ਟੀਮਾਂ ਬਣਾਈਆਂ ਗਈਆਂ ਅਤੇ ਨਵੀਂ ਟੈਕਨਾਲੋਜੀ ਦੀ ਮਦਦ ਨਾਲ ਉਨ੍ਹਾਂ ਨੂੰ ਲੱਭਣ ਦੀ ਕੋਸ਼ਿਸ਼ ਕੀਤੀ। ਇਸ ਤਰ੍ਹਾਂ ਪੁਲੀਸ ਨੇ ਲਾਪਤਾ ਮਾਂ-ਪੁੱਤ ਨੂੰ ਹਲਦਵਾਨੀ ਵਿੱਚ ਟਰੇਸ ਕਰ ਲਿਆ ਗਿਆ। ਐਸਪੀ ਸ੍ਰੀ ਕਲੇਰ ਨੇ ਦੱਸਿਆ ਕਿ ਹਲਦਵਾਨੀ ਵਿੱਚ ਜਾ ਕੇ ਉਨ੍ਹਾਂ ਨਾਲ ਗੱਲਬਾਤ ਕੀਤੀ ਗਈ, ਉਨ੍ਹਾਂ ਦੀ ਕੌਂਸਲਿੰਗ ਕੀਤੀ ਗਈ। ਇਸ ਤਰ੍ਹਾਂ ਉਨ੍ਹਾਂ ਨੂੰ ਗੱਲੀਬਾਤੀ ਸਮਝਾ ਕੇ ਵਾਪਸ ਪਰਿਵਾਰ ਨਾਲ ਮਿਲਾਇਆ ਗਿਆ। ਪੁਲਸ ਨੇ ਮਾਂ-ਪੁੱਤ ਨੂੰ ਉਨ੍ਹਾਂ ਦੇ ਪਰਿਵਾਰ ਦੇ ਸਪੁਰਦ ਕਰ ਦਿੱਤਾ ਹੈ।