ਉਦਯੋਗਾਂ ਤੇ ਸਟਾਰਟਅਪਜ਼ ਨੂੰ ਦਰਸਾਉਂਦੀ ਪ੍ਰਦਰਸ਼ਨੀ ਨਾਲ ਸ਼ੁਰੂ ਹੋਇਆ ਪ੍ਰਗਤੀਸ਼ੀਲ ਪੰਜਾਬ ਨਿਵੇਸ਼ਕ ਸੰਮੇਲਨ-2019

ਉਦਯੋਗਾਂ ਤੇ ਸਟਾਰਟਅਪਜ਼ ਨੂੰ ਦਰਸਾਉਂਦੀ ਪ੍ਰਦਰਸ਼ਨੀ ਨਾਲ ਸ਼ੁਰੂ ਹੋਇਆ ਪ੍ਰਗਤੀਸ਼ੀਲ ਪੰਜਾਬ ਨਿਵੇਸ਼ਕ ਸੰਮੇਲਨ-2019

ਨਬਜ਼-ਏ-ਪੰਜਾਬ ਬਿਊਰੋ, ਮੁਹਾਲੀ, 5 ਦਸੰਬਰ:
ਇੱਥੋਂ ਦੇ ਇੰਡੀਅਨ ਸਕੂਲ ਆਫ਼ ਬਿਜ਼ਨਸ (ਆਈਐਸਬੀ) ਵਿੱਚ ਅੱਜ ਪ੍ਰਮੁੱਖ ਉਦਯੋਗਾਂ, ਐਮਐਸਐਮਈਜ਼ ਅਤੇ ਸਟਾਰਟਅੱਪਜ ਨੂੰ ਦਰਸਾਉਂਦੀ ਪ੍ਰਦਰਸ਼ਨੀ ਨਾਲ ਦੋ ਰੋਜ਼ਾ ਪ੍ਰਗਤੀਸ਼ੀਲ ਪੰਜਾਬ ਨਿਵੇਸ਼ਕ ਸੰਮੇਲਨ-2019 ਧੂਮ ਧੜੱਲੇ ਨਾਲ ਸ਼ੁਰੂ ਹੋਇਆ। ਪੰਜਾਬ ਦੇ ਉਦਯੋਗ ਮੰਤਰੀ ਸੁੰਦਰ ਸ਼ਾਮ ਅਰੋੜਾ ਨੇ ਇਕ ਪ੍ਰਦਰਸ਼ਨੀ ਦਾ ਉਦਘਾਟਨ ਕੀਤਾ ਅਤੇ ਸ਼ਿਖਰਲੇ ਘਰੇਲੂ ਤੇ ਅੰਤਰਰਾਸ਼ਟਰੀ ਉਦਯੋਗਾਂ ਵੱਲੋਂ ਆਪਣੇ ਉਤਪਾਦਾਂ ਨੂੰ ਪ੍ਰਦਰਸ਼ਿਤ ਕੀਤਾ ਗਿਆ। ਆਈਟੀਸੀ, ਟਰਾਈਡੈਂਟ, ਸੋਨਾਲੀਕਾ, ਹੀਰੋ ਇਲੈਕਟ੍ਰਿਕ ਵਹੀਕਲ ਪ੍ਰਾਈਵੇਟ, ਕ੍ਰੀਮਿਕਾ ਵਰਗੀਆਂ ਪ੍ਰਮੁੱਖ ਕੰਪਨੀਆਂ ਨੇ ਆਪਣੇ ਉਤਪਾਦਾਂ ਨੂੰ ਪ੍ਰਦਰਸ਼ਨੀ ਵਿੱਚ ਪ੍ਰਦਰਸ਼ਿਤ ਕਰਨ ਲਈ ਰੱਖਿਆ ਗਿਆ। ਜਿਸ ਵਿੱਚ ਇਕ ਐਮਐਸਐਮਈ ਅਤੇ ਸਟਾਰਟਅਪਜ਼ ਲਈ ਸਟਾਲਾਂ ਮੌਜੂਦ ਸਨ।
ਇਸ ਮੌਕੇ ਸ੍ਰੀ ਅਰੋੜਾ ਨੇ ਵੱਖ ਵੱਖ ਸਟਾਲਾਂ ਦਾ ਦੌਰਾ ਕਰਕੇ ਨਿਰੀਖਣ ਕੀਤਾ ਅਤੇ ਸਨਅਤੀ ਘਰਾਣਿਆਂ ਗੱਲ ਕੀਤੀ। ਉਨ੍ਹਾਂ ਕਿਹਾ ਕਿ ਪੰਜਾਬ ਸਰਕਾਰ ਘਰ-ਘਰ ਰੁਜ਼ਗਾਰ ਅਤੇ ਕਾਰੋਬਾਰ ਮਿਸ਼ਨ ਤਹਿਤ ਆਪਣੀਆਂ ਪ੍ਰਾਪਤੀਆਂ ਅਤੇ ਨੀਤੀਆਂ ਦਾ ਪ੍ਰਦਰਸ਼ਨ ਕਰ ਰਹੀ ਹੈ ਤਾਂ ਜੋ ਹੋਣਹਾਰ ਉੱਦਮੀਆਂ ਨੂੰ ਰਾਜ ਵਿੱਚ ਇਕਾਈਆਂ ਸਥਾਪਤ ਕਰਨ ਲਈ ਉਤਸ਼ਾਹਿਤ ਕੀਤਾ ਜਾ ਸਕੇ।ਪ੍ਰਦਰਸ਼ਨੀ ਵਿੱਚ ਉੱਭਰ ਰਹੇ ਸਟਾਰਟਅਪਜ਼ ਲਈ ਆਪਣੇ ਉਤਪਾਦਾਂ ਨੂੰ ਪ੍ਰਦਰਸ਼ਿਤ ਕਰਨ ਲਈ ਇਕ ਵੱਖਰਾ ਸਥਾਨ ਰੱਖਿਆ ਗਿਆ ਹੈ। ਕੁਝ ਸਟਾਰਟਅਪਜ ਨੇ ਆਪਣੇ ਵਾਤਾਵਰਨ ਅਨੁਕੂਲ ਉਤਪਾਦਾਂ ਨੂੰ ਪ੍ਰਦਰਸ਼ਿਤ ਕੀਤਾ ਹੈ, ਜਿਵੇਂ ਕਿ ਟੈਕਸਫੈਬ ਲਿਮਟਿਡ ਦੇ ਕੱਪੜੇ ਜੋ ਕਿ ਕੂੜਾ-ਕਰਕਟ ਤੇ ਪਲਾਸਟਿਕ ਦੀਆਂ ਬੋਤਲਾਂ ਨੂੰ ਰੀਸਾਈਕਲ ਕਰਕੇ ਬਣਾਏ ਜਾਂਦੇ ਹਨ। ਇਸੇ ਤਰ੍ਹਾਂ ਵਿੰਡਸਰ ਇੰਡਸਟਰੀ ਕੁਰਾਲੀ ਵੱਲੋਂ ਬਾਇਓਡੀਗਰੇਡੇਬਲ ਅਤੇ ਕੰਪੋਸਟੇਬਲ ਟੇਬਲ ਵੇਅਰ ਉਤਪਾਦਾਂ ਦੀ ਪ੍ਰਦਰਸ਼ਨੀ ਲਗਾਈ ਗਈ।
ਇਸ ਪ੍ਰਦਰਸ਼ਨੀ ਵਿੱਚ ਹਿੱਸਾ ਲੈਣ ਵਾਲੇ ਪ੍ਰਮੁੱਖ ਐਮਐਸਐਮਈਜ਼ ਵਿੱਚ ਗਿਲਾਰਡ ਇਲੈਕਟ੍ਰਾਨਿਕਸ ਪ੍ਰਾਈਵੇਟ ਲਿਮਟਿਡ, ਫਾਲਕਨ ਗਾਰਡਨ ਟੂਲਜ਼ ਪ੍ਰਾਈਵੇਟ ਲਿਮਟਿਡ, ਟੈਨੋਰ ਆਰਥੋਟਿਕਸ ਪ੍ਰਾਈਵੇਟ ਲਿਮਟਿਡ, ਸ੍ਰੀ ਰਾਮ ਪੈਨਲਜ਼ ਪ੍ਰਾਈਵੇਟ ਲਿਮਟਿਡ, ਵਿੰਡਸਰ ਇੰਡਸਟਰੀਜ਼ ਪ੍ਰਾਈਵੇਟ ਲਿ. ਲਿਮਟਿਡ ਸ਼ਾਮਲ ਹਨ। ਇਸ ਖੇਤਰ ਵਿੱਚ ਡੇਰਾਬੱਸੀ ਵਿੱਚ ਸਥਿਤ ਇਕਾਈ, ਐਲੇਂਜਰਸ ਮੈਡੀਕਲ ਸਿਸਟਮ ਖਿੱਚ ਦਾ ਕੇਂਦਰ ਰਹੀ ਜੋ ਕਿ ਪੰਜਾਬ ਤੋਂ ਇਲਾਵਾ ਏਮਜ਼, ਸਫਦਰਜੰਗ, ਨਵੀਂ ਦਿੱਲੀ ਸਥਿਤ ਰਾਮ ਮਨੋਹਰ ਲੋਹੀਆ ਵਰਗੇ ਵੱਡੇ ਹਸਪਤਾਲਾਂ ਨੂੰ ਮੈਡੀਕਲ ਉਪਕਰਨਾਂ ਦੀ ਸਪਲਾਈ ਦਿੰਦੀ ਹੈ। ਇਸ ਕੰਪਨੀ ਦਾ ਪੂਰੇ ਭਾਰਤ ਦੇ ਹਸਪਤਾਲਾਂ ਵਿਚ ਰੇਡੀਓਲੌਜੀ ਉਪਕਰਨਾਂ ਵਿਸ਼ੇਸ਼ ਕਰਕੇ ਐਕਸਰੇ ਮਸ਼ੀਨਾਂ ਦੀ ਸਪਲਾਈ ਕਰਨ ਵਿੱਚ ਕੁੱਲ 36 ਫੀਸਦੀ ਹਿੱਸਾ ਹੈ। ਇਸ ਪ੍ਰਦਰਸ਼ਨੀ ਵਿੱਚ ਜਲੰਧਰ ਦੀ ਇਕਾਈ ਏਐੱਮ ਇੰਟਰਨੈਸ਼ਨਲ ਦਾ ਪ੍ਰਦਰਸ਼ਨ ਵੀ ਇਕ ਹੋਰ ਮੁੱਖ ਆਕਰਸ਼ਨ ਰਿਹਾ। ਜੋ ਰਗਬੀ ਗੇਂਦ ਅਤੇ ਖੇਡਾਂ ਦੇ ਕੱਪੜਿਆਂ ਵਰਗੇ ਖੇਡ ਉਤਪਾਦਾਂ ਦਾ ਉਤਪਾਦਨ ਕਰਦੀ ਹੈ, ਅਤੇ ਇਸ ਕੰਪਨੀ ਨੂੰ ਨਵੰਬਰ ਵਿੱਚ ਜਪਾਨ ਵਿੱਚ ਹੋਏ ਰਗਬੀ ਵਰਲਡ ਕੱਪ-2019 ਲਈ ਰਗਬੀ ਗੇਂਦਾਂ ਦੀ ਸਪਲਾਈ ਕਰਨ ਦਾ ਮਾਣ ਪ੍ਰਾਪਤ ਹੈ। ਏਸ਼ੀਆ ਦੀ ਸਭ ਤੋਂ ਵੱਡੀ ਸਹਿਕਾਰੀ ਫੈਡਰੇਸ਼ਨ, ਪੰਜਾਬ ਮਾਰਕਫੈੱਡ ਵੱਲੋਂ ਆਪਣੇ ਪ੍ਰਮੁੱਖ ਭੋਜਨ ਉਤਪਾਦਾਂ ਜਿਵੇਂ ਸੋਹਨਾ ਬੋਤਲਬੰਦ ਉਤਪਾਦ, ਖਾਣ ਲਈ ਤਿਆਰ ਭੋਜਨ ਪਦਾਰਥ, ਮਿਕਸਡ ਫਰੂਟ ਜੈਮ, ਸੋਹਣਾ ਆਟਾ, ਕੁਦਰਤੀ ਸ਼ਹਿਦ, ਟਮਾਟੋ ਕੈਚੱਪ ਆਦਿ ਦਾ ਪ੍ਰਦਰਸ਼ਨ ਕੀਤਾ ਹੈ।