ਢਾਬੇ, ਰੇਸਤਰਾਂ ਤੇ ਹੋਰ ਕਮਰਸ਼ੀਅਲ ਅਦਾਰੇ ਰਾਤ ਨੂੰ 12 ਵਜੇ ਤੋਂ ਸਵੇਰੇ 6 ਵਜੇ ਤੱਕ ਖੁੱਲ੍ਹੇ ਰੱਖਣ ’ਤੇ ਪਾਬੰਦੀ ਦੇ ਹੁਕਮ

ਢਾਬੇ, ਰੇਸਤਰਾਂ ਤੇ ਹੋਰ ਕਮਰਸ਼ੀਅਲ ਅਦਾਰੇ ਰਾਤ ਨੂੰ 12 ਵਜੇ ਤੋਂ ਸਵੇਰੇ 6 ਵਜੇ ਤੱਕ ਖੁੱਲ੍ਹੇ ਰੱਖਣ ’ਤੇ ਪਾਬੰਦੀ ਦੇ ਹੁਕਮ

ਨਬਜ਼-ਏ-ਪੰਜਾਬ ਬਿਊਰੋ, ਮੁਹਾਲੀ, 16 ਮਾਰਚ:
ਮੁਹਾਲੀ ਦੇ ਜ਼ਿਲ੍ਹਾ ਮੈਜਿਸਟਰੇਟ-ਕਮ-ਡਿਪਟੀ ਕਮਿਸ਼ਨਰ ਸ੍ਰੀਮਤੀ ਗੁਰਪ੍ਰੀਤ ਕੌਰ ਸਪਰਾ ਨੇ ਲੋਕ ਸਭਾ ਚੋਣਾਂ 2019 ਦੇ ਮੱਦੇਨਜ਼ਰ ਫੌਜਦਾਰੀ ਜ਼ਾਬਤਾ ਸੰਘਤਾ ਦੀ ਧਾਰਾ 144 ਅਧੀਨ ਮਿਲੀਆਂ ਸ਼ਕਤੀਆਂ ਦੀ ਵਰਤੋਂ ਕਰਦਿਆਂ ਦੇਰ ਰਾਤ ਤੱਕ ਰੇਸਤਰਾਂ/ਢਾਬੇ, ਪਾਰਟੀ ਵਾਲੀਆਂ ਥਾਵਾਂ ਤੇ ਠੇਕੇ ਖੁੱਲ੍ਹਣ ਰੱਖਣ ਅਤੇ ਫੜ੍ਹੀਆਂ ਲਾਉਣ ਉੱਤੇ ਰੋਕ ਲਗਾ ਦਿੱਤੀ ਹੈ। ਜ਼ਿਲ੍ਹਾ ਮੈਜਿਸਟਰੇਟ ਨੇ ਕਿਹਾ ਕਿ ਆਮ ਲੋਕਾਂ ਦੀ ਅਸੁਵਿਧਾ ਨੂੰ ਧਿਆਨ ਵਿੱਚ ਰੱਖਦਿਆਂ ਜ਼ਿਲ੍ਹਾ ਐਸ.ਏ.ਐਸ. ਨਗਰ (ਮੁਹਾਲੀ) ਦੀ ਹੱਦ ਅੰਦਰ ਅਜਿਹੀਆਂ ਕਮਰਸ਼ੀਅਲ ਥਾਵਾਂ ਰਾਤੀਂ 12 ਵਜੇ ਤੋਂ ਸਵੇਰੇ 6 ਵਜੇ ਤੱਕ ਖੁੱਲ੍ਹੀਆਂ ਰੱਖਣ ਉੱਤੇ ਪਾਬੰਦੀ ਰਹੇਗੀ। ਅਜਿਹੇ ਕਾਰੋਬਾਰਾਂ ਦੇ ਮਾਲਕ ਆਪਣੇ ਕਾਰੋਬਾਰੀ ਅਦਾਰਿਆਂ ਵਿੱਚ ਐਨਡੀਪੀਐਸ ਐਕਟ ਦੀਆਂ ਹਦਾਇਤਾਂ, ਜਿਹੜੀਆਂ ਉਨ੍ਹਾਂ ਦੇ ਕਾਰੋਬਾਰ ’ਤੇ ਲਾਗੂ ਹੁੰਦੀਆਂ ਹਨ ਦੀ ਪਾਲਣਾਂ ਲਈ ਵੀ ਪਾਬੰਦ ਹੋਣਗੇ। ਇਨ੍ਹਾਂ ਕਾਰੋਬਾਰੀਆਂ ਵੱਲੋਂ ਤਾਇਨਾਤ ਨਿੱਜੀ ਸੁਰੱਖਿਆ ਅਮਲਾ ਇਸ ਗੱਲ ਤੋਂ ਜਾਣੂ ਹੋਣਾ ਜ਼ਰੂਰੀ ਹੈ ਕਿ ਕੋਈ ਵੀ ਵਿਅਕਤੀ ਸਬੰਧਤ ਅਦਾਰੇ ਵਿੱਚ ਅਜਿਹੀ ਚੀਜ਼ ਆਪਣੇ ਨਾਲ ਲੈ ਕੇ ਨਾ ਆਵੇ\ਜਾਵੇ ਜਿਹੜੀ ਐਨਡੀਪੀਐਸ ਐਕਟ 1985 ਦੀ ਉਲੰਘਣਾ ਕਰਦੀ ਹੋਵੇ। ਉਨ੍ਹਾਂ ਕਿਹਾ ਕਿ ਕੋਈ ਵੀ ਅਦਾਰਾ ਬਿਨਾਂ ਪ੍ਰਮਾਣਕ ਲਾਇਸੈਂਸ ਤੋਂ ਆਪਣਾ ਕਾਰਵਾਈ ਨਹੀਂ ਚਲਾ ਸਕੇਗਾ। ਇਹ ਹੁਕਮ 10 ਮਈ 2019 ਤੱਕ ਲਾਗੂ ਰਹਿਣਗੇ। ਉਨ੍ਹਾਂ ਕਿਹਾ ਕਿ ਇਹ ਹੁਕਮ ਹਸਪਤਾਲਾਂ, ਦਵਾਈਆਂ ਦੀਆਂ ਅਧਿਕਾਰਤ ਥਾਵਾਂ ਅਤੇ ਪੈਟਰੋਲ ਪੰਪਾਂ ਉੱਤੇ ਲਾਗੂ ਨਹੀਂ ਹੋਣਗੇ।