ਬਾਗਬਾਨੀ ਵਿਭਾਗ ਸਖ਼ਤ ਸੁਰੱਖਿਆ ਜਾਂਚ ਤਹਿਤ ਵੱਖ-ਵੱਖ ਫਲੇਵਰਸ ਦੇ ਪਦਾਰਥਾਂ ਦੀ ਕਰੇਗਾ ਵਿਕਰੀ

ਬਾਗਬਾਨੀ ਵਿਭਾਗ ਸਖ਼ਤ ਸੁਰੱਖਿਆ ਜਾਂਚ ਤਹਿਤ ਵੱਖ-ਵੱਖ ਫਲੇਵਰਸ ਦੇ ਪਦਾਰਥਾਂ ਦੀ ਕਰੇਗਾ ਵਿਕਰੀ

ਜੋਤੀ ਸਿੰਗਲਾ
ਨਬਜ਼-ਏ-ਪੰਜਾਬ ਬਿਊਰੋ, ਮੁਹਾਲੀ, 13 ਜੂਨ:
ਗਰਮੀਆਂ ਦੇ ਮੌਸਮ ਨੂੰ ਧਿਆਨ ਵਿੱਚ ਰੱਖਦਿਆਂ ਅਤੇ ਕਰੋਨਾਵਾਇਰਸ ਮਹਾਂਮਾਰੀ ਦੇ ਮੱਦੇਨਜ਼ਰ ਆਮ ਲੋਕਾਂ ਨੂੰ ਪੀਣ ਵਾਲੇ ਮਿਆਰੀ ਪਦਾਰਥ ਮੁਹੱਈਆ ਕਰਵਾਉਣ ਦੀ ਵਚਨਬੱਧਤਾ ਨਾਲ ਦੁਹਰਾਉਂਦਿਆਂ ਬਾਗਬਾਨੀ ਵਿਭਾਗ ਲੋਕਾਂ ਦੀ ਮੰਗ ਅਨੁਸਾਰ ਵੱਖ-ਵੱਖ ਫਲਾਂ ਦੇ ਫਲੇਵਰਸ ਵਾਲੇ ਸਕੁਐਸ਼ ਤਿਆਰ ਕਰ ਰਿਹਾ ਹੈ। ਅੱਜ ਇੱਥੇ ਇਹ ਜਾਣਕਾਰੀ ਦਿੰਦਿਆਂ ਬਾਗਬਾਨੀ ਵਿਭਾਗ ਮੁਹਾਲੀ ਦੇ ਡਿਪਟੀ ਡਾਇਰੈਕਟਰ ਮੁਖਤਿਆਰ ਸਿੰਘ ਨੇ ਦੱਸਿਆ ਕਿ ਵਿਭਾਗ ਕੋਲ ਅੰਬ, ਬਿੱਲ ਫਰੂਟ, ਲੀਚੀ ਅਤੇ ਅਨਾਨਾਸ ਵਰਗੇ ਕਈ ਤਰ੍ਹਾਂ ਦੇ ਸਕੁਐਸ਼ ਹਨ ਜੋ ਲੋਕਾਂ ਨੂੰ ਵਾਜਬ ਭਾਅ ’ਤੇ ਸਪਲਾਈ ਕੀਤੇ ਜਾ ਰਹੇ ਹਨ।
ਅਧਿਕਾਰੀ ਨੇ ਦੱਸਿਆ ਕਿ ਸਕੁਐਸ਼ ਸੁਰੱਖਿਆ ਜਾਂਚ ਤੋਂ ਬਾਅਦ ਸਰਕਾਰੀ ਫੂਡ ਪ੍ਰਾਸੈਸਿੰਗ ਪ੍ਰਯੋਗਸ਼ਾਲਾਵਾਂ ਵਿਖੇ ਚੋਟੀ ਦੇ ਗੁਣਾਂ ਦੇ ਉਤਪਾਦਾਂ ਦੁਆਰਾ ਖਪਤਕਾਰਾਂ ਦੀ ਸੰਤੁਸ਼ਟੀ ਨੂੰ ਯਕੀਨੀ ਬਣਾਉਣ ’ਤੇ ਵਿਸ਼ੇਸ਼ ਜ਼ੋਰ ਦੇ ਕੇ ਤਿਆਰ ਕੀਤੇ ਜਾਂਦੇ ਹਨ। ਇਹ ਸਕੁਐਸ਼ ਬੋਤਲਾਂ ਜ਼ਿਲ੍ਹਾ ਪ੍ਰਬੰਧਕੀ ਕੰਪਲੈਕਸ ਦੀ ਤੀਜ਼ੀ ਮੰਜ਼ਲ ’ਤੇ ਸਥਿਤ ਕਮਰਾ ਨੰਬਰ-447 ’ਚੋਂ ਕਿਸੇ ਵੀ ਕੰਮ ਵਾਲੇ ਸਮੇਂ ਦੌਰਾਨ ਖਰੀਦੀਆਂ ਜਾ ਸਕਦੀਆਂ ਹਨ।