ਸ਼ੇਰਗਿੱਲ ਨੂੰ ਮੁਹਾਲੀ ਤੋਂ ਆਪ ਦੀ ਟਿਕਟ ਮਿਲਣ ’ਤੇ ਪਿੰਡ ਝਿੰਗੜਾ ਤੇ ਕੁਰਾਲੀ ਵਿੱਚ ਮਨਾਈਆਂ ਜਸ਼ਨ

ਸ਼ੇਰਗਿੱਲ ਨੂੰ ਮੁਹਾਲੀ ਤੋਂ ਆਪ ਦੀ ਟਿਕਟ ਮਿਲਣ ’ਤੇ ਪਿੰਡ ਝਿੰਗੜਾ ਤੇ ਕੁਰਾਲੀ ਵਿੱਚ ਮਨਾਈਆਂ ਜਸ਼ਨ

ਰਜਨੀਕਾਂਤ ਗਰੋਵਰ
ਨਬਜ਼-ਏ-ਪੰਜਾਬ ਬਿਊਰੋ, ਕੁਰਾਲੀ, 2 ਜਨਵਰੀ:
ਆਮ ਆਦਮੀ ਪਾਰਟੀ (ਆਪ) ਵੱਲੋਂ ਮੁਹਾਲੀ ਤੋਂ ਉੱਘੇ ਸਮਾਜ ਸੇਵੀ ਆਗੂ ਅਤੇ ਖੇਡ ਪ੍ਰਮੋਟਰ ਨਰਿੰਦਰ ਸਿੰਘ ਸ਼ੇਰਗਿੱਲ ਨੂੰ ਟਿਕਟ ਮਿਲਣ ਦੀ ਖੁਸ਼ੀ ਵਿੱਚ ਸ਼ੇਰਗਿੱਲ ਦੇ ਜੱਦੀ ਪਿੰਡ ਝਿੰਗੜਾ ਅਤੇ ਕੁਰਾਲੀ ਵਿੱਚ ਆਪ ਦੇ ਵਾਲੰਟੀਅਰਾਂ ਅਤੇ ਇਲਾਕੇ ਦੇ ਲੋਕਾਂ ਨੇ ਲੱਡੂ ਵੰਡ ਕੇ ਜਸ਼ਨ ਮਨਾਇਆ। ਇਸ ਮੌਕੇ ਕੁਰਾਲੀ ਵਿੱਚ ਨਰਿੰਦਰ ਸਿੰਘ ਸ਼ੇਰਗਿੱਲ ਦੇ ਦਫ਼ਤਰ ਵਿੱਚ ਇਕੱਤਰ ਸਰਕਲ ਕੁਰਾਲੀ ਦੇ ਅਹੁਦੇਦਾਰਾਂ ਸਰਕਲ ਇੰਚਾਰਜ ਹਰੀਸ਼ ਕੌਂਸਲ, ਯੂਥ ਆਗੂ ਸਤਨਾਮ ਸਿੰਘ ਸੱਤਾ, ਮੇਜਰ ਸਿੰਘ ਝਿੰਗੜਾ, ਬਲਵਿੰਦਰ ਕੌਰ ਧਨੌੜਾ ਇੰਚਾਰਜ ਲੋਕ ਸਭਾ ਹਲਕਾ ਸ੍ਰੀ ਅਨੰਦਪੁਰ ਸਾਹਿਬ, ਰਘਵੀਰ ਸਿੰਘ, ਰਣਧੀਰ ਸਿੰਘ ਝਿੰਗੜਾ, ਕੁਲਦੀਪ ਸਿੰਘ ਸਮੇਤ ਵੱਡੀ ਗਿਣਤੀ ਵਿੱਚ ਵਰਕਰਾਂ ਨੇ ਕਿਹਾ ਕਿ ਪਾਰਟੀ ਹਾਈ ਕਮਾਂਡ ਵੱਲੋਂ ਇੱਕ ਵਧੀਆ ਫੈਸਲਾ ਲੈ ਕੇ ਨਰਿੰਦਰ ਸਿੰਘ ਸ਼ੇਰਗਿੱਲ ਨੂੰ ਹਲਕਾ ਮੁਹਾਲੀ ਤੋਂ ਟਿਕਟ ਨਾਲ ਨਿਵਾਜਿਆ ਗਿਆ ਹੈ। ਜਿਸ ਨਾਲ ਪਾਰਟੀ ਪੂਰੇ ਜ਼ਿਲ੍ਹੇ ਵਿੱਚ ਮਜ਼ਬੂਤੀ ਨਾਲ ਜਿੱਤ ਦਰਜ਼ ਕਰਨ ਵੱਲ ਵਧੇਗੀ। ਇਸ ਮੌਕੇ ਇਕੱਤਰ ਵਰਕਰਾਂ ਅਤੇ ਅਹੁਦੇਦਾਰਾਂ ਨੇ ਲੱਡੂ ਵੰਡ ਕੇ ਖੁਸ਼ੀ ਮਨਾਈ ਅਤੇ ਪਿੰਡ ਝਿੰਗੜਾਂ ਵਿਖੇ ਵੀ ਲੋਕਾਂ ਨੇ ਨਰਿੰਦਰ ਸਿੰਘ ਸ਼ੇਰਗਿੱਲ ਨੂੰ ਟਿਕਟ ਮਿਲਣ ਦੀ ਖੁਸ਼ੀ ਮਨਾਈ।
ਜ਼ਿਕਰਯੋਗ ਹੈ ਕਿ ਨਰਿੰਦਰ ਸਿੰਘ ਸ਼ੇਰਗਿੱਲ ਦਾ ਪਰਿਵਾਰ ਪਿਛਲੇ ਕਈ ਦਹਾਕਿਆਂ ਤੋਂ ਇਲਾਕੇ ਅੰਦਰ ਸਮਾਜ ਸੇਵਾ ਕਰਦਾ ਆ ਰਿਹਾ ਹੈ ਤੇ ਨਰਿੰਦਰ ਇਸੰਘ ਸ਼ੇਰਗਿੱਲ ਹਲਕਾ ਖਰੜ ਤੋਂ ਟਿਕਟ ਦੇ ਪ੍ਰਮੁੱਖ ਦਾਅਵੇਦਾਰ ਸਨ ਪਰ ਹਾਈਕਮਾਂਡ ਵੱਲੋਂ ਐਨ ਮੌਕੇ ’ਤੇ ਖਰੜ ਤੋਂ ਕੰਵਰ ਸੰਧੂ ਨੂੰ ਉਮੀਦਵਾਰ ਐਲਾਨ ਦਿੱਤਾ ਸੀ ਜਿਸ ਕਾਰਨ ਪੂਰਾ ਹਲਕਾ ਪਾਰਟੀ ਖਿਲਾਫ ਹੋ ਤੁਰਿਆ ਸੀ ਹੁਣ ਨਰਿੰਦਰ ਸਿੰਘ ਸ਼ੇਰਗਿੱਲ ਨੂੰ ਹਲਕਾ ਮੁਹਾਲੀ ਤੋਂ ਟਿਕਟ ਮਿਲਦਿਆਂ ਹੀ ਹਲਕਾ ਖਰੜ ਦੇ ਪਾਰਟੀ ਵਰਕਰ ਖੁਸ਼ ਹਨ ਅਤੇ ਕੰਵਰ ਸੰਧੂ ਨਾਲ ਖੁੱਲ ਕੇ ਤੁਰ ਰਹੇ ਹਨ।